Azərbaycan ədəbiyyatı dünyada tanınmır | Səlim Babullaoğluna niyə rüşvət təklif edildi? - QAPQARA
“Qapqara” verilişinin yeni buraxılışı yayımlanıb.
Verilişin budəfəki sayının qonağı şair, tərcüməçi Səlim Babullaoğlu olub.
S.Babullaoğlu şairin Allahla münasibətlərindən bəhs edib:
“Düşünmürəm ki, şairin Allahla xüsusi münasibətləri olmalıdır. Məncə, bəndənin Allahla və ya Allahın bəndə ilə münasibətləri var, olmalıdır. Belə bir ifadə var ki, Allahla danışmaq istəyirsənsə, ibadət et, Allahın sənə dediklərini eşitmək istəyirsənsə, baş verən hadisələrə diqqət et.
Allah yeganə məbuddur ki, onu aldatmaq mümkün deyil. O nəinki bizim istədiklərimizi, hətta istəməyə utandıqlarımızı, yaxud qəlbimizin dərinliklərində gizlətdiklərimizi bilir və bir qayda olaraq bizə nəsib edəndə istəklərimizin ən xeyirlisini qismət edir. Allah bizi peşələrə görə ayırmır, inananlara və inanmayanlara, xeyirli və yaxud ziyanlı əməl sahiblərinə görə ayırır”.
Səlim Babullaoğlu “Şair özünü rüşvətdən necə qorumalıdır?” sualına belə cavab verib:
“Məncə insan özünü rüşvətdən qorumalıdır, şair yox. Təəssüf ki, mənə dəfələrlə rüşvət təklif olunub. Əvvəla, daxilən dərin təəssüf hissi keçirmişəm, qüssələnib, kədərlənmişəm. 3 ildir Yazıçılar Birliyinin Qəbul Komissiyasının rəhbəriyəm.
O insanları başa düşə bilmirəm ki, rüşvət verib Yazıçılar Birliyinin vəsiqəsini almaq istəyirlər. Bu, çox acınacaqlı haldır. Təbii ki, həmin insanlara qarşı kobudluq etməmişəm. Amma izah etməyə çalışmışam ki, pulları belə çoxdursa, ehtiyacı olan bir adama kömək etsinlər”.
![icon](/images/loading.png)