Azərbaycanda Novruzun sonuncu - İlaxır çərşənbəsi qeyd olunur

Bu gün Azərbaycanda Novruz bayramının sonuncu, yəni Torpaq çərşənbəsi qeyd olunur. Bölgələrdə isə sonuncu çərşənbə olduğu üçün İlaxır çərşənbə kimi də tanınır.

Torpaq çərşənbəsinin sonuncu qeyd olunmasının səbəbi belə yozulur ki, 1-ci su, sonra od oyanaraq təbiəti isidir. Daha sonra külək əsir, hava təzələnir və yenilənir. Beləliklə, su, od və yel birlikdə ümumilikdə torpağın oyanmasına gətirib çıxarırlar. Torpaq da oyanandan sonra təbiət oyanmağa başlayır, ağaclar çiçək açır, yaşıllıqlar yaranır və torpaq əkinçilər üçün istifadəyə tam hazır olur.

Azərbaycanın bəzi bölgələrində sonuncu çərşənbə Novruz bayramından daha geniş qeyd olunur. Qızlar qapı pusmağa, qulaq falına gedirlər. Uşaqlar qapı-qapı düşüb papaq atırlar.

Çərşənbələrdə yumurtaların rəngbərəng boyanması fəsillərə işarədir. Ağ rəng qışın, sarı payızın, qırmızı yayın, yaşıl rəng isə yazın rəmzidir.

Qeyd edək ki, Azərbaycana yaz fəsli martın 20-də Bakı vaxtı ilə saat 07:06:21-də daxil olacaq. Martın 20-21-i Azərbaycanda Novruz bayramı qeyd olunur.