Bakıda heç kimin getmək istəməyəcəyi ərazi | Problemlər niyə həll edilmir? - Baku TV

Sabunçu rayonunun Pirşağı qəsəbəsində sakinlər yol və infrastruktur problemlərindən şikayətlənirlər.

Onlar asfalt örtüyünün olmaması, işıq dirəklərinin quraşdırılmaması və digər çatışmazlıqların gündəlik həyatlarına çətinlik yaratdığını bildirirlər.

Sakinlərin sözlərinə görə, bəzi küçələrin hətta adı və layihələndirməsi ilə bağlı dəqiq məlumat yoxdur. Asfaltsız yollar xüsusilə payız-qış aylarında yağışdan sonra keçilməz vəziyyətə düşür. Bu səbəbdən taksilər də əraziyə tam daxil olmaq istəmir.

Qəsəbədə digər problemlərdən biri də tullantıların idarə olunmasıdır. Sakinlər bildirirlər ki, yaxınlıqda zibil konteynerləri olmadığı üçün tullantıları uzaq məsafəyə daşımalı olurlar.

Bundan əlavə, ərazidə su xətlərinin köhnəlməsi səbəbindən problemlər yaşanır. Sakinlərdən birinin evində içməli suyun boru xəttinin partlaması nəticəsində həyətə və zirzəmiyə axdığı bildirilir.

Sakinlər qeyd edirlər ki, dəfələrlə bələdiyyəyə və Sabunçu Rayon İcra Hakimiyyətinə müraciət etsələr də, problemlər hələ də həllini tapmayıb.