Bakıda müəmmalı bina | Niyə illərdir heç kim yaşamır?

Xətai rayonu, Sarayevo küçəsində yerləşən binada uzun illərdir heç kəs yaşamır.

Vətəndaşların sözlərinə görə, bina 15 ildən çoxdur inşa olunsa da, burada hələ də sakin yoxdur. Lakin binanın altındakı iaşə obyektləri fəaliyyət göstərir.

Sakinlər deyirlər ki, binada qaz, işıq təminatı da mövcuddur.

“Gah deyirlər, bina əyri tikilib, gah da deyirlər ki, binada nəsə problem var”, ‒ deyə sakinlərdən biri söyləyib.

Binanın mühafizəçisi Kamal Ələsgərov isə bildirib ki, yaxın vaxtlarda mənzillərin satışa çıxarılması planlaşdırılır.

“Hazırda binada satış yoxdur. Burada məndən başqa heç kim yaşamır. Lakin yaxın günlərdə satış olmalıdır”, – o qeyd edib.

K.Ələsgərov həmçinin binanın qəzalı olması ilə bağlı iddiaları təkzib edib:

“Qəzalı binanın altında market ola bilər?”.

Məsələ ilə bağlı Şəhərsalma və Arxitektura Komitəsindən verilən məlumata görə, Bakı Şəhər İcra Hakimiyyəti sözügedən binanın tikintisinə 2005-ci ildə icazə verib, istismarına isə 2024-cü il noyabrın 29-dan başlanıb.