Bakıda özbaşınalıq | MTK mənzili xəbərsiz söküb?

Bakıda Mənzil Tikinti Kooperativi ilə vətəndaş arasında qarşıdurma yaşanıb.

Belə ki, paytaxtın Nəsimi rayonu, Mirqasımov küçəsində MTK heç bir xəbərdarlıq etmədən vətəndaşın mənzilini söküb. Xoşbəxtlikdən həmin vaxt sözügedən ərazidə heç kim olmayıb. Mənzil tamamilə yararsız vəziyyətə düşüb.

Ev sahibi bildirib ki, bundan əvvəl həmin tikinti şirkəti hər hansı razılaşma üçün onlara yaxınlaşmayıb:

“Yaxşı ki, evdə heç kim olmayıb. Uşaqları anası məktəbə aparmışdı. Həmin vaxt gəlib evi söküblər. Bundan əvvəl də evin damını sökmüşdülər. Bir ildən çoxdur ki, evin damı yox idi. Heç bir danışıq, razılıq olmayıb. Belə özbaşınalıq heç yerdə görünməyib. Hər tərəfi darmadağın ediblər”.

Məsələ ilə əlaqədar MTK-dan bildirilib ki, sözügedən ərazidə qəzalı vəziyyətdə olan və istismar müddəti keçmiş binaların sökülməsinə başlanıb. Həmin binalar kustar üsulla tikildiyindən söküntü zamanı vətəndaşın eyvanına zərər dəyib:

“Bildiririk ki, vətəndaşın mənzilinə dəymiş zərərlə bağlı hüquq-mühafizə orqanlarında araşdırma gedir. Tərəfimizdən həmin eyvanın bərpa edilməsi ilə bağlı bütün tədbirlər görüləcək”.