“Baku TV”nin beynəlxalq mükafatlara layiq görülən “Söz” filminin təqdimatı

Baku TV-nin istehsal etdiyi "Söz" qısametrajlı sənədli filminin Nizami Kino Mərkəzində təqdimat mərasimi keçirilib.

Tədbirdə dövlət və özəl qurumların, eləcə də ictimai sektorun nümayəndələri iştirak ediblər.

Film 44 günlük Vətən müharibəsinə həsr olunub və Baku TV-nin əməkdaşı, Vətən müharibəsi iştirakçısı Ələkbərin həyat hekayəsini təsvir edir.

Qeyd edək ki, film Qarabağ həqiqətlərinin dünya ictimaiyyətinə çatdırılması məqsədilə rus və ingilis dillərində təqdim olunur.

"Söz" sənədli filmi beynəlxalq uğurlar da qazanıb. Belə ki, ekran əsəri Los-Ancelesdə keçirilən və hər il minlərlə filmin təqdim olunduğu "Accolade Global Film Competition"da mükafat qazanıb. Film həmçinin "Roma Prisma Film Awards" yarışmasının finalçısı olub.

Xatırladaq ki, IMDB tərəfindən təsdiqlənən "Accolade Global Film Competition" dünyanın ən nüfuzlu 25 film festivalından biridir. 21 illik tarixində festivalda dünyanın məşhur aktyorları, prodüserləri, rejissorları və ssenaristləri mükafatlandırılıblar. Mükafatçılar arasında Ridli Skott, Maykl Duqlas, Killian Merfi və Erik Roberts kimi məşhur şəxslər var.