"Baku TV"nin gündəmə gətirdiyi qanunsuz tikili ilə bağlı tədbir görüldü - Baku TV

Xırdalan şəhərində yeni tikililərin sayı artır. Bu dəfə sakinlər Bakı-Şamaxı şosesinin 8 ünvanında, piyada yolunda ev tikildiyini iddia edirlər.

Vətəndaşların sözlərinə görə, əvvəllər burada piyadalar hərəkət edir, həmçinin ərazi avtomobillərin saxlanılması üçün istifadə olunurdu. Lakin son vaxtlar həmin sahədə tikinti işlərinə başlanılıb.

“Boş ərazi idi. Camaat maşınını saxlayıb Xırdalana işinə, gücünə gedirdi. İndi də buranı zəbt etdilər. Özü də bizim bu ərazi dövlət planına düşüb. Dəmir yolunun altından tunel qazanda, o yol bağlananda biz məcbur olub bu köməkçi yoldan istifadə etdik. Burada da gəlib tikinti ilə yolumuzu kəsdilər. İki il bundan qabaq getdim, icra hakimiyyəti başçısının müavininin qəbulunda oldum. Tikintini dayandırdılar. İndi iki ildən sonra yenidən başlayıblar”, – deyə sakin şikayətini dilə gətirib.

Baku TV məsələ ilə bağlı Abşeron Rayon İcra Hakimiyyətinə sorğu ünvanlayıb. Sorğudan çox keçmədi ki, qanunsuz olduğu iddia edilən tikili söküldü.