“Bədənlərini A4 kağızla ölçürlər ki...” | Trend uğrunda qadınların başlarına nələr gəlir

Son 20 ilin tendensiyası göstərir ki, qadınlar jurnal üzqabıqlarındakı obrazlara məxsus bədən quruluşuna sahib olmaq istəyirlər.

Trend bunu tələb edir, yoxsa tələb trendi yaradır, bir qədər mübahisəli məsələdir, amma nəticə odur ki, qadınlar artıq çəkidən azad olmağa sağlamlıq üçün yox, dəblə ayaqlaşmaq üçün can atırlar.

Baku TV paytaxt sakinləri arasında mövzu ilə bağlı sorğu keçirib. Vətəndaşlar cəmiyyətdə artıq çəki ilə bağlı deyilən sözlərin qadınların özlərini bəyənməməsinə səbəb olduğunu bildiriblər.

Elə bu yaxınlarda türkiyəli fenomen Nihal Candanın başına gələnlər cəmiyyətə ciddi mesaj ötürdü. Anoreksiyadan ölən fenomenin taleyi əslində qeyri-sağlam yolla arıqlamağa can atanları bir daha düşünməyə vadar etməlidir.

Psixoloq Aygül Məlikova açıqlamasında bildirib ki, qadınların həddindən artıq çəki itirməsinə yaşadıqları travmalar ciddi təsir göstərir:

“Ətrafındakı insanların qadına “köksən” deməsi ona mənfi təsir edir. Yemək onu xoşbəxt etməməyə başlayır. Yeməyi çeynəyir, amma udmur. Bir müddət sonra çəkisini artıran bütün yeməklərdən imtina edir”.

Sosial şəbəkələrdə son vaxtlar “A4 beli” trendi də yaranıb. Belə ki, xanımlar bellərini A4 kağızı ilə ölçürlər. Əgər bədən kağızın kənarlarından görünürsə, arıqlamaq şərtdir.