Blogerlə danışan erməni makler Xankəndidən ev almaq üçün şərtləri açıqladı
Məşhur azərbaycanlı bloger Kamran Razmovar Xankəndidə ev satışı ilə məşğul olan erməni əsilli maklerə zəng edərək ondan şəhərdəki mənzillərin qiyməti, alqı-satqı prosedurları və sənədləşmə işinin necə aparılması ilə maraqlanıb.
Bloger söhbətin əvvəlində özünü Rusiyanın Krasnodar şəhərində yaşayan erməni əsilli şəxs kimi təqdim edib.
Kamran Razmovarın qarşı tərəflə ünsiyyəti rus dilinin erməni aksentində qurması erməniyə məsələnin mahiyyətini anlamağa imkan verməyib. Söhbət əsnasında makler evin görüntüsünü təqdim edib, mənzilin şəraiti barədə blogerə məlumat verib.
Dialoqda diqqət çəkən əsas məqam isə sənədləşmə ilə bağlı müzakirə olub. Erməni makler blogerə bildirib ki, alqı-satqı prosesində ona yalnız iltizam verə bilər, lakin evin şəhadətnamə sənədini iki ildən sonra “ASAN xidmət”dən almaq mümkün olacaq.
“Azərbaycanlılar burada yeni sistem quracaqlar, “ASAN xidmət” olacaq. Sənəddə ölkənin adı Azərbaycan kimi qeyd olunacaq”, – deyə makler etiraf edib.
![icon](/images/loading.png)