Bu ərazidəki obyektlərin qiyməti gözü kəlləyə çıxarır | Ekspertdən açıqlama

Bakıda məşhur biznes mərkəzlərindən birinin 120 milyon manata satışa çıxarılması belə obyektlərin qiymətlərinin necə müəyyən olunmasını gündəmə gətirir.

Ümumilikdə isə qiyməti milyonlarla olan qeyri-yaşayış sahələrinə paytaxtın müxtəlif ərazilərində rast gəlinir.

Belə ki, elan saytlarına nəzər salanda məlum olur ki, Ağ Şəhər adlanan ərazidə sahəsi 3 150 kvadratmetr olan təmirsiz obyektin qiyməti 38 milyon 800 min manatdır. Həmçinin “Gənclik” stansiyasına yaxın ərazidə yerləşən əmlak 22 milyon manata satılır. Mərkəzdən kənarda – Sulutəpə qəsəbəsində yerləşən digər obyektin qiyməti isə 27 milyon manatdır.

Daşınmaz əmlak üzrə ekspert Elnur Fərzəliyev bildirib ki, hər hansısa əmlakın bazar dəyərini müəyyən etmək üçün öncə onun yerləşdiyi ərazi, həmin ərazidəki torpaq sahəsinin qiyməti, tikinti xərci və daha önəmlisi isə gəlirlilik hesablanır:

“Əgər qeyri-yaşayış obyekti hər hansısa bir torpaq sahəsi üzərində ayrıca tikilidirsə, sözügedən ərazidəki torpaq sahəsinin bazar qiyməti, ümumi tikinti xərci, həmin əmlak əgər icarədədirsə onun icarə qiyməti hesablanaraq satış məbləği müəyyən olunur. Adətən qeyri-yaşayış obyektinin icarə qiyməti onun satış məbləğinin 0,5 faiz nisbəti ilə hesablanır”.

Ekspert onu da əlavə edib ki, qiymətlərə obyektin harada yerləşməsi və icarə haqqından başqa, onun hər hansı markaya aid olması da təsir edir. Belə əmlakların qiyməti eyni ərazidə yerləşən digər obyektlərdən yüksək olur.