Bu qaydaları pozanları cərimə gözləyir | Sürücülərin diqqətinə

Qanunvericiliyə “velosiped yolu” anlayışı daxil edilir.

Bu, Milli Məclisin iyunun 21-də keçirilən iclasında müzakirəyə çıxarılan “Yol hərəkəti haqqında” qanuna təklif edilən dəyişiklikdə əksini tapıb.

Yeniliyə əsasən, velosiped yollarında velosiped və kiçik elektrik nəqliyyat vasitələri istisna olmaqla digər nəqliyyat vasitələrinin hərəkəti, dayanması və ya durması qadağandır.

Qanunvericiliyə edilən digər dəyişiklikdə isə ödəniş etmədən parklanma yerini tərk edənlər inzibati məsuliyyətə cəlb olunacaq. Həmçinin Dövlət Avtomobil Yollarında səlahiyyəti olmayan şəxslərin parklanma yerləri təşkil etməsi, parklanma xidməti göstərməsi, həmin xidmətlə bağlı ödəniş tələb etməsi İnzibati Xətalar Məcəlləsi ilə müəyyən edilmiş qaydada məsuliyyətə səbəb olur.

Qeyd edək ki, ödənişli parklanma yerlərində nəqliyyat vasitələrinin 15 dəqiqəyədək parklanması üçün heç bir vəsait tələb olunmur.

Bundan əlavə, xidməti parklanma yerlərində avtomobil saxlayanlar da cərimələnəcək. Belə ki, yeni layihəyə əsasən, xidməti zərurətlə əlaqədar dövlət orqanlarının istifadəsində olan və onların əməkdaşlarına məxsus nəqliyyat vasitələrindən başqa digər avtomobillərin xidməti parklanma yerlərində parklanmasına görə 40 manat cərimə ediləcək.

Həmçinin əlilliyi olan şəxslərin nəqliyyat vasitələri üçün nəzərdə tutulmuş parklanma yerlərində digər avtomobillərin parklanmasına görə 60 manat cərimə tətbiq ediləcək. Texniki cəhətdən nasaz olan kiçik elektrik nəqliyyat vasitəsinin icarəyə verilməsinə görə dörd yüz manatdan altı yüz manatadək cərimə var.

Avtomobili taksi duracaqlarında saxlayanları isə 40 manat cərimə gözləyir. Elektrik mühərrikli nəqliyyat vasitələri üçün enerji doldurma məqsədilə parklanma yerləri 5.15 yol nişanına 7.5.9 lövhəciyi əlavə olunmaqla müəyyən ediləcək.

“Yol hərəkəti haqqında” qanuna təklif edilən dəyişikliyə əsasən, həmin parklanma yerlərində enerji doldurmaq məqsədilə elektrik mühərrikli nəqliyyat vasitələrinin durması istisna olmaqla nəqliyyat vasitələrinin parklanması qadağandır.