Bu şərtləri ödəyən kişilər pensiyaya 5 il tez çıxacaq

Həyat yoldaşı vəfat edən kişilərin himayəsində uşaq varsa, növbəti dəfə ailə qurduğu halda belə onlar təqaüdə 5 il tez çıxa biləcəklər.

Bu, Milli Məclisdə müzakirəyə çıxarılan “Əmək pensiyaları haqqında” qanuna dəyişiklik layihəsində əksini tapıb.

Sosioloqlar isə düşünür ki, qanun təkcə kişilərə şamil olunmamalıdır.

“Bu məsələ ictimaiyyət tərəfindən böyük müzakirələrə səbəb oldu. Kişilərə şamil ediləcək hüquq qadınlar tərəfindən də istənilə bilər. Eyni zamanda valideyn himayəsindən məhrum olunmuş uşaqları himayəsinə götürüb 8 yaşınadək böyüdən qadınlara da 5 il erkən pensiya hüququ tanınır. Pensiya ilə bağlı dəyişikliklər bütünlüklə mütərəqqi dəyişikliklərdir, amma bunlar universal səciyyə daşımalıdır. Sözügedən güzəşt kişilərlə yanaşı, qadınlara da tanınmalıdır”, – deyə sosioloq Üzeyir Şəfiyev bildirib.

Qeyd edək ki, hazırda pensiya yaşı kişilərdə 65, qadınlarda isə 1 iyul 2023 - 30 iyun 2024-cü il müddətində 63 il 6 ay, 1 iyul 2024 - 30 iyun 2025-ci il müddətində isə 64 il olacaq.