Çəki atmaq istəyənlər nədə səhv edir? | Doğru bilinən yanlışlar

Niyə məşhur pəhrizlər yalnız müvəqqəti nəticə verir və çəki daha da artıq şəkildə geri qayıdır?

Cavab sadədir: arıqlama sənayesinə sərf edən miflərə əsaslanan üsullar çoxluq təşkil edir.

1-ci mif: “Az yesən, daha arıq olarsan”. Çox sərt məhdudiyyətlər maddələr mübadiləsini zəiflədir. Bədən “qənaət rejiminə” keçir və hər qramı ehtiyatda saxlamağa başlayır. Bu, arıqlamaq əvəzinə daha da çəki artımına gətirib çıxara bilər.

2-ci mif: “Yağlar bədən üçün təhlükəlidir”. Əslində, “Omega-3” və “Omega-6” yağ turşuları piylərin parçalanmasını sürətləndirir. Bu yağların çatışmazlığı isə hormonların, o cümlədən əzələ tonusuna cavabdeh olan testosteronun istehsalını pozar.

3-cü mif: “Superqidalar piyləri əridir”. 3-Goji giləmeyvəsi, spirulina kimi məhsullar kalori defisitini əvəz edə bilməz. Bunlar daha çox marketinq hiylələridir, elm deyil. Arıqlamaq üçün əsas prinsip qəbul edilən enerjinin sərf ediləndən az olmasıdır.

4-cü mif: “Yerində yağ yandırmaq mümkündür”. Əzələ məşqləri qarındakı piyləri təkbaşına yox etmir. Qarın piylərindən qurtulmaq üçün ümumi bədən piyinin qadınlarda 25, kişilərdə isə 15 faizdən aşağı salınması vacibdir.

5-ci mif: “Detoks çayları orqanizmi təmizləyir”. Əslində, detoks çayları bədəndən yalnız suyu çıxarır və bağırsaq mikroflorasını poza bilər. Bu da maddələr mübadiləsini zəiflədərək arıqlama prosesini çətinləşdirir.

Bəs əvəzində nə etməli?

- Kalori ehtiyacınızı hesablayın və gündəlik normadan 15-20 faiz az qəbul edin.
- Zülal-yağ-karbohidrat balansını qoruyun. Zülal əzələlərin qorunmasını təmin edir.
- Yağlar (qoz-fındıq, avokado) hormon balansını saxlayır.
- Mürəkkəb karbohidratlar (qarabaşaq, kinoa) enerji verir.
- Sevdiyiniz fiziki fəaliyyəti seçin: rəqs, üzgüçülük, yürüş. İdman məcburiyyət yox, həzz mənbəyi olmalıdır. Həftədə bir dəfə sevdiyiniz yeməkləri yeyin, bu, pəhrizdən çıxmaların qarşısını alır.
- Stresi idarə edin: Kortizol hormonu piylərin parçalanmasını əngəlləyir. Meditasiya, hobbilər və istirahət arıqlama prosesində əsas rol oynayır.

Unutmayın: Arıqlamaq yalnız pəhriz deyil, bu, balanslı həyat tərzidir.