Cərrah yayılan görüntülərə aydınlıq gətirdi | Səhiyyə Nazirliyi hərəkətə keçdi

Həkim əməliyyat zamanı doğum gününü qeyd edib.

Hələ bu azmış kimi həmin görüntüləri öz sosial şəbəkə hesablarında da paylaşıb.

Görüntülərdən məlum olur ki, özəl klinikaların birində cərrah mama-ginekoloq Ləman Əliyeva xəstəni əməliyyat edərkən iş yoldaşları ona ad günü “sürpriz”i edib.

Əməliyyat zamanı klinikanın digər işçiləri əməliyyat otağına əlcəksiz daxil olaraq həkimi doğum günü münasibətilə təbrik ediblər. Ləman Əliyeva təbrikləri qəbul edərək şamı da üfürüb.

Görüntülərdən də aydın olur ki, həm həkim, həm də həmkarları gigiyena qaydalarına məhəl qoymayaraq xəstənin həyatını təhlükəyə atıblar.

Sözügedən görüntülərdə yer alan cərrah mama-ginekoloq Ləman Əliyeva “Oxu.az”a açıqlamasında belə deyib:

“Hadisədən xəbərim yox idi. Tibb bacıları otağa daxil olanda çaşıb qaldım. Çevrilib gördüm ki, mənə belə bir sürpriz ediblər. Mən vəziyyəti başa düşənə qədər müəyyən vaxt keçdi. Məni təbrik etmək üçün otağa daxil olanların hamısı əməliyyatda iştirak edən tibb bacılarıdır. Onlara mən nə deyə bilərdim ki?”.

Ginekoloq qeyd edib ki, həmin görüntüləri paylaşdığı üçün peşmandır.

Qeyd edək ki, faktla əlaqədar Səhiyyə Nazirliyi Analitik Ekspertiza Mərkəzi tərəfindən artıq yoxlamalara başlanılıb.

Qurumdan bildirilib ki, məsələ ciddi araşdırılacaq. Yoxlama bitəndən sonra nəticəsi barədə ətraflı məlumat veriləcək.