Dil inkişafına təsir edən amillər | Körpələrin məlumatları təhlil edildi, ortaya çıxdı ki…

Yeni beynəlxalq araşdırma göstərir ki, körpələr tövsiyə olunan ekran vaxtı limitlərini aşır və bu, onların dil inkişafına mənfi təsir edə bilər.

Tədqiqat 20 ölkədən olan alimlərin iştirakı ilə aparılıb və 19 Latın Amerikası ölkəsində 1878 körpənin məlumatları təhlil edilib.

Nəticələr göstərib ki, körpələr arasında ən çox istifadə edilən cihazlar televizor və smartfonlardır. Orta gündəlik ekran müddəti bir saatdan çoxdur və əyləncə məqsədli məzmun izlənilir.

Ekran istifadəsinin sosial-iqtisadi statusa və ölkəyə görə dəyişkənlik göstərdiyi, imkansız ailələrdə kitab istifadəsinin daha az olduğu müəyyənləşib.

Əldə edilən nəticələrə əsasən, ekran vaxtı ilə dil inkişafı arasında mənfi əlaqə üzə çıxıb.

Televizor qarşısında çox vaxt keçirmək aşağı leksik inkişafla əlaqələndirilir. Bunun əksinə, kitaba maraq daha yaxşı dil bacarıqları formalaşdırıb.

Mütəxəssislər erkən yaşda televizor və smartfonlardan həddindən artıq çox istifadənin nitqin inkişafına mənfi təsir etdiyini vurğulayırlar. Pediatrlar iki yaşdan kiçik uşaqlar üçün ekran istifadəsini məsləhət görmür, daha böyük yaş qrupları üçün isə məhdud və nəzarət altında istifadəni tövsiyə edirlər.

Qeyd edək ki, COVID-19 pandemiyasından sonra uşaqlarda ekran istifadəsinin artması fonunda bu mövzuda narahatlıqlar çoxalıb.