Dişlərin sağlamlığı üçün hansı qidalardan istifadə etməliyik?

“Dişlərin sağlamlığı təkcə ağız boşluğunun gigiyenasından deyil, həm də qidalanmadan asılıdır”.

Bu barədə rusiyalı həkim Viktoriya Radkon danışıb.

Onun sözlərinə görə, kalsium diş minası üçün əsas tikinti materialıdır, o, dentini möhkəmləndirir və dişlərin dağılmasının qarşısını alır.

Ftor və fosforla birlikdə bu element minanı kariyesə qarşı daha davamlı edir. Süd məhsulları, həmçinin balıq və qoz-fındıq kalsiumla zəngindir.

Həkimin fikrincə, diş ətinin sağlamlığı üçün mübadilə proseslərini stimullaşdıran və iltihabın qarşısını alan “C” vitamini lazımdır. Bu vitamin sitrus meyvələrində, çiyələkdə və şirin bibərdə çoxdur.

Viktoriya Radkon onu da qeyd edib ki, yüksək turşuluğa malik meyvələr minanı nazikləşdirə bilər, buna görə də onları yedikdən sonra ağzı su ilə yaxalamaq lazımdır.

Dəmir və “B12” vitamini ağız boşluğunun selikli qişasının sağlamlığını qoruyur, xora və iltihabın qarşısını alır. Bu elementlər ətdə bol miqdarda var. Bundan əlavə, alma, yerkökü, turp və kərəviz nəinki orqanizmi vitaminlərlə zənginləşdirir, həm də dişlər üçün təbii fırça rolunu oynayır.

Mütəxəssis xatırladır ki, düzgün qidalanma mütəmadi ağız boşluğu gigiyenası ilə birlikdə dişləri sağlam saxlamağın və stomatoloji problemlərin qarşısını almağın ən yaxşı yoludur.