Əczaçının belə tövsiyələri yolverilməzdir | Bu dərmanlara qarşı diqqətli olun

Sosial şəbəkələrdə, xüsusilə “TikTok” platformasında əczaçıların müxtəlif dərman vasitələrini reklam etməsi hallarına tez-tez rast gəlirik.

İzləyicisi çox olan səhifələrdə çəkinmədən insanlara dərmanlar tövsiyə olunur. Həkim məsləhəti olmadan qəbul edilən bu həblərin hansı fəsadlara yol aça biləcəyi isə reklam edən tərəfə maraqlı deyil.

Hüquqşünas Hikmət Əliyev məsələ ilə bağlı bildirib ki, yalnız resept olmadan buraxılan dərman vasitələri reklam edilə bilər:

“Reklam zamanı yetkinlik yaşına çatmayan şəxslərə müraciət etmək, reklam olunan dərman vasitələrinin istifadəsi nəticəsində xəstəliklərin sağalmasının konkret hallarına istinad etmək, həkimə müraciət etməyin lazımsız olduğu barədə təsəvvür yaratmaq, reklam olunan dərman vasitəsinin əlavə təsirlərinin olmamasına təminat vermək kimi hallar qadağandır”.

H.Əliyev əlavə edib ki, əczaçının dərman vasitəsini tövsiyə etməsi və ya müalicəyə yönəltməsi yolverilməzdir.