Eldar Mansurova görə dahilik anlayışı | Yerindən durana korifey deyirlər...

“Şərti şumda kəsək. Dahi söhbətini yığışdıraq. Dahilərin hamısı torpağın altındadır, torpağın üstündə dahi yoxdur. Dahi kimə deyə bilərik Azərbaycanda?”.

Bu sözləri Xalq artisti Eldar Mansurov “Hərşeyşünas” podkastında qonaq olarkən söyləyib.

Tanınmış sənətkar açıqlamasında dahilik anlayışı ilə bağlı fikirlərini bölüşüb. O bildirib ki, hər tanınmış və görkəmli insanı dahi adlandırmaq doğru deyil:

“Dahi çox deyil. Tanınmış, görkəmli ola bilər. Belə sənət adamları var, amma dahi o adamdır ki, bu ölkəyə, bu xalqa elə bir şey bəxş edib ki, millətin simvoluna dönüb. Bunlar kimlərdir? Üzeyir Hacıbəyov, Fikrət Əmirov, Qara Qarayev bəstəkarlardan bunları sayıram dahi. Müğənnilərdən isə iki dahimiz var: Rəşid Behbudov, Müslüm Maqomayev”.

Sənətkar eyni zamanda “korifey” sözünün çox zaman yersiz istifadə edildiyini vurğulayıb:

“Mən bu sözlərdən ehtiyat edirəm əslində. Məsələn, “korifey” sözünü sağ adama deyirlər. Görürsən ki, sənətdə o qədər də sözünü deməyən, amma istedadlı birinə korifey deyirlər. Yerindən durana korifey deyirlər. Ümumiyyətlə, korifeylər, dahilər – bunlar torpağın altındadır, ay camaat”.