Sənətin dində yeri | Muğamın islam mədəniyyəti ilə bağlılığı nədir? - AMİN

Baku TV-nin “Amin” verilişinin yeni buraxılışı yayımlanıb.

Verilişin budəfəki sayında Xalq artisti, bəstəkar Eldar Mansurov və ilahiyyatçı Zaur Orucovla sənət və din mövzusu müzakirə edilib.

E.Mansurov qeyd edib ki, Allah yeri-göyü yaradanda musiqi dünyada var idi:

“Tar, kamança xanəndədən söhbət getmir. Ən qüdrətli musiqi aləti Allahın yaratdığı küləkdir. Onun vasitəsilə ağaclar dillənir. Küləyin səsini dənizin dalğalarında da eşitmək mümkündür. Təbiət özü bir musiqidir. Kinolarda, sənədli filmlərdə rejissorlar adətən dəniz qırağında çəkilən səhnələrdə təbiətin səsindən istifadə etməyə üstünlük verir”.

Xalq artisti bildirib ki, muğamın tarixi qədimlərə gedib çıxır:

“Muğamda hər cür əhvali-ruhiyyə var. Onda həm döyüşkənlik, həm də kədər əksini tapıb. Muğam hələ dinlər yaranmamışdan əvvəl olub. O, bir çox ölkələrdə müxtəlif olsa da, kökü eynidir. Musiqi, muğam qərinələr boyu yaranıb”.

Zaur Orucovun sözlərinə görə, sənət Allahı axtarmaqdır.

“Ruh bədənə girəndə ruhlar aləmində eşitdiyi ən gözəl səsi bu dünyada axtarmağa başlayır. Bəzən bir notda, şeir parçasında həmin səsi axtarır.

İslamın ən gözəl xüsusiyyəti odur ki, insanın təbiətinə toxunmur. Onun orijinallığı qalmalıdır, çünki insan təbiətlə həmahəngdir. Təbiətin də ruhu var. Daxili ruh xarici ruhdan davamlı ilham alır. Bu ilhamın qarşısını kəsən hansı nüanslardırsa, İslam o yerdə müdaxilə edir. Çünki bura artıq təhlükəli hesab olunur, təbiətlə bağımızı qoparır”, – deyə o bildirib.