Elə olub ki, gəlinim ayaqlarımı yuyub… | Lerikli nənə ailədəki qayda-qanundan danışdı - O VAXTLAR

“O vaxtlar” verilişinin yeni buraxılışı yayımlanıb.

Verilişin budəfəki sayında Binə sakini Azadə Salmanova öz həyat hekayəsindən bəhs edib.

1956-cı ildə Lerikdə anadan olan Azadə xanım ailə həyatı qurduqdan sonra Binədə məskunlaşıb. Onun sözlərinə görə, həyat yoldaşı çox qısqanc adam olub:

“Çalışdığım yerdə kişilərlə işlədiyimə görə məni qısqanırdı. Hər dəfə yoldaşımı xatırlayanda kövrəlirəm. Xoşbəxt adamdır ki, heç kimi incitmədən, heç kəsə möhtac olmadan həyatdan getdi”.

İllərdir gəlini ilə eyni evdə yaşayan Azadə xanım deyir ki, gəlini evə gəldiyi ilk gün ona ana deyib:

“Gəlinimin atası cavan yaşda həyatını itirib. Yoldaşıma deyirdim ki, o, sənə ata deməsə, incimə. Amma gəlinim evə gəldiyi gündən bizə ata-ana deyib”.

A.Salmanova ailə münasibətlərindən bəhs edib.

“Yoldaşım əsəbi adam idi. Həmişə ona deyirdim ki, hər şeyi görüb-eşitmə. Özünü gəlinimizin yerinə qoy, icazə ver gəncliyini yaşasın. İndiki dövr başqadır. Böyüklər də gərək gəncləri başa düşsün”, – deyə o əlavə edib.