Münasibəti bərpa etmək istəmədi, canından oldu | Xəzər rayonunda dəhşətli qətl - Baku TV

Xəzər rayonunun Binə qəsəbəsində qətl hadisəsi baş verib. Aralarında yaranan mübahisə zamanı 40 yaşlı Müseyib Əhmədov 24 yaşlı sevgilisi Fatimə Rəhmanzadəyə çoxsaylı bıçaq xəsarətləri yetirərək onu qətlə yetirib.

Məlumata görə, bir müddət əvvəl ailəsindən ayrılan 40 yaşlı M.Əhmədov 24 yaşlı F.Rəhmanzadə ilə tanış olub. Qısa müddət sonra cütlük kirayə mənzil tutaraq birgə yaşamağa başlayıb. Lakin bir müddət sonra onlar arasında münaqişələr yaranıb. Yaşanan növbəti mübahisədən sonra M.Əhmədov iki gün evə gəlməyib.

İki gündən sonra mənzilə qayıdan M.Əhmədov sevgilisini evdə görməyib və onu axtarmaq üçün çalışdığı kafeyə gedib. O, F.Rəhmanzadəni evə qaytarmaq istəsə də, qadın onunla ayrılmaq istədiyini və bir daha həmin evə dönməyəcəyini bildirib. Bu səbəbdən tərəflər arasında küçədə yenidən mübahisə yaranıb.

Mübahisə zamanı M.Əhmədov bıçaqla F.Rəhmanzadəyə çoxsaylı xəsarətlər yetirib. Ağır vəziyyətdə xəstəxanaya çatdırılan 24 yaşlı qadının həyatını xilas etmək mümkün olmayıb.

Cinayəti törətməkdə şübhəli bilinən Müseyib Əhmədov polis əməkdaşlarının keçirdiyi əməliyyat tədbirləri nəticəsində saxlanılaraq istintaqa təhvil verilib.

Faktla bağlı Xəzər Rayon Prokurorluğunda araşdırma aparılır.