Əlişah qalasında nələr tapıldı? - Tədqiqatın nəticələri heyrətləndirdi

Astaranın Alaşa kəndi ərazisində yerləşən Əlişah qalasında tədqiqat işləri aparılır.

Orta əsrlərə aid hesab olunan qala strateji cəhətdən əlverişli mövqedə tikilib.

AMEA-nın Arxeologiya və Antropologiya İnstitutunun şöbə müdiri Mikayıl Mustafayevin sözlərinə görə, torpaq qatının təmizlənməsi nəticəsində ərazidə 3 ədəd kiçikhəcmli otaq aşkar olunub:

“Otaqların ərazilərində maddi-mədəniyyət nümunələri tapılıb. Onlardan saxsı qırıntıları, həmçinin miniatür tipli saxsı keramikalar, kaşılar aşkarlanıb”.

Şöbə müdiri qeyd edib ki, Əlişah qalası İran İslam Respublikası ilə həmsərhəddir, buradan İran ərazisinin açıq şəkildə müşahidəsi mümkündür.

“Qala yüksək olduğu üçün buradan Xəzər dənizinin yaxşı görüntüsü var. Bu da o deməkdir ki, ərazisi müşahidə qalası kimi düzgün strateji mövqedə seçilmişdir”, – deyə M.Mustafayev bildirib.