Astarada dənizdə axtarılan Masallı sakininin ölkədən çıxdığı bildirilir - Baku TV

Dənizdə boğulduğu deyilən şəxs hava yolu ilə ölkəni tərk edib.

Belə ki, avqust ayının 19-da saat 19:00 radələrində Masallı rayon sakini, 36 yaşlı Elmar Məmmədlinin Xəzər dənizinin Astara şəhəri ərazisindəki çimərliyində boğulması, meyitinin isə suda itkin düşməsi barədə polisə məlumat daxil olub.

Astara Rayon Polis Şöbəsinin əməkdaşlarının həyata keçirdikləri müvafiq tədbirlərlə həmin şəxsin suda boğulmadığı, avqust ayının 20-də hava yolu ilə ölkə hüdudlarını tərk etdiyi müəyyən edilib. Araşdırmalar davam etdirilir.

Qeyd edək ki, 3 gün öncə Astara şəhərinin “Bulvar” ərazisində bir nəfərin Xəzər dənizində batması barədə məlumat daxil olub. Masallı rayonunun Kosagül kənd sakini olan, 1990-cı il təvəllüdlü Elmar Məmmədlinin yaxın qohumları ilə çimmək üçün dənizə gəldiyi qeyd edilib. Elmar Məmmədli ailəlidir və 5 uşaq atasıdır.