Erməniəsilli şəxslərin məhkəməsində zərərçəkmişlər dindirildi

Çoxsaylı cinayətlər törətməkdə təqsirləndirilən Ermənistan Respublikasının vətəndaşları ‒ Araik Arutyunyan, Arkadi Qukasyan, Bako Sahakyan, David İşxanyan, David Babayan, Levon Mnatsakanyan və digərlərinin barəsində olan cinayət işləri üzrə açıq məhkəmə prosesinin baxış iclası aprelin 24-də davam etdirilib.

Əvvəlcə məhkəmədə Şuşanın işğal olunmasına qədər baş vermiş hadisələrlə bağlı sənədlər tədqiq edilib.

Protokolları tədqiq edilən ilk fakt 1989-cu il dekabrın 13-14-də, digər hadisələr isə sonrakı müddətlərdə qeydə alınıb.

İşğala qədər Şuşa şəhəri və ətraf kəndlərin Ermənistan Silahlı Qüvvələri tərəfindən dəfələrlə müxtəlif silahlarla, o cümlədən raketlərlə və toplarla atəşə tutulması, azərbaycanlıların yaşadığı kəndlərin su kəmərlərinin və yüksəkgərginlikli elektrik xəttinin partladılması, təhsil, səhiyyə və digər mülki obyektlərə, vətəndaşların evlərinə, avtomobillərinə və digər əmlaklara ciddi zərər dəyməsi qeyd olunub.

Malıbəyli və Quşçular qətliamı kimi tanınan hadisələr, Göytala kəndində uçuş zamanı vertolyotun atəşə tutulması, 1992-ci il yanvarın 28-də sərnişin vertolyotunun vurulması faktları üzrə prokotollar tədqiq edilib. Daha sonra zərərçəkmiş şəxslər dindirilib.

İlham Həsənov qardaşı Rövşən Həsənovun 1992-ci il mayın 7-dən 8-nə keçən gecə Şuşada itkin düşdüyünü deyib. “Həmin vaxt bombalar Şuşaya yağış kimi yağırdı”, ‒ deyə o əlavə edib.

Digər zərərçəkmiş şəxslər dövlət ittihamçılarının, zərərçəkmişlərin nümayəndələrinin və müdafiə tərəfinin suallarını cavablandırıblar. Onlar təqsirləndirilən şəxslərin layiqli formada cəzalandırılmasını məhkəmədən xahiş ediblər.

Məhkəmənin növbəti iclası aprelin 25-nə təyin olunub.