Ermənilərin növbəti məhkəməsi keçirildi

Çoxsaylı cinayətlər törətməkdə təqsirləndirilən Ermənistan Respublikasının vətəndaşları ‒ Araik Arutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digərlərinin barəsində olan cinayət işləri üzrə açıq məhkəmə prosesinin baxış iclası keçirilib.

Məhkəmə iclasında üzrlü səbəbdən iştirak edə bilməyən və bununla bağlı məhkəməyə müraciət etmiş zərərçəkmiş şəxslərin ifadələri elan olunub.

Elan olunan ifadəyə əsasən, zərərçəkmiş şəxsin hüquqi varisi qismində dindirilən Mehriban Kərimova bildirib ki, Ermənistan silahlı qüvvələri 1992-ci il aprelin 8-də yaşadığı Kəlbəcər rayonunun Ağdaban kəndinə silahlı hücum edərək çoxsaylı şəxsi qəsdən öldürüb, bir neçə şəxsə müxtəlif ağır bədən xəsarətləri yetirib, anası Qəməri isə avtomatdan atəş açaraq qətlə yetiriblər.

Onlar girov götürüldükdən sonra kəndin mərkəzində yaşlı bir qadının evinə aparılıblar. O, burada təxminən 6 yaşında Ülviyyə adlı uşağın yerdə uzanıqlı vəziyyətdə olduğunu görüb. Məlum olub ki, Ülviyyə atası Camalın belində olarkən Ermənistan hərbçiləri atəş açaraq ikisini birlikdə öldürüblər.

Bundan başqa, həmin vaxt orada olan Tural adlı kənd sakinini əlləri bağlı halda aparıb, arxadan güllələyib və ot tayasında yandırıblar. Turalın anasını isə ağzından avtomatla atəş açaraq öldürüblər.

İclasda digər zərərçəkmiş şəxslərin də ifadələri elan edilib.

Qeyd edək ki, növbəti məhkəmə prosesi oktyabrın 23-də keçiriləcək.