Ermənistan mövqelərimizi minaatanlardan atəşə tutdu

Mayın 12-si saat 17:15-də Ermənistan Silahlı Qüvvələrinin Basarkeçər rayonunun Zod istiqamətində yerləşən bölmələri Azərbaycan Ordusunun üzbəüz mövqelərini minaatanlardan atəşə tutub.

Müdafiə Nazirliyindən verilən məlumata görə, bölmələrimiz tərəfindən adekvat cavab tədbirləri görülür. Şəxsi heyət və texnika baxımından itkimiz yoxdur.

Bundan əvvəl yayılan xəbərə görə isə saat 11:30-da Ermənistan Silahlı Qüvvələri sözügedən ərazidən Ordumuzun üzbəüz yerləşən mövqeləri istiqamətində "Zərbə" pilotsuz uçuş aparatları tətbiq edib. Qarşı tərəf törətdiyi bu təxribatla vəziyyəti yenidən gərginləşdirməyə çalışır.

Qeyd edək ki, mayın 11-dən 12-nə keçən gecə Azərbaycan-Ermənistan şərti sərhədinin müxtəlif istiqamətlərində də mövqelərimiz 17 dəfə atəşə tutulub. Bundan başqa, Rusiya sülhməramlı qüvvələrinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri Azərbaycan Ordusunun mövqelərinə fasilərlə atəş açıb.