Ermənistan vətəndaşlarının apellyasiya şikayətlərinə baxılması davam etdirilir - Baku TV

İyulun 24-də Bakı Apellyasiya Məhkəməsində Ermənistanın Azərbaycana qarşı hərbi təcavüzü ilə bağlı ağır cinayətlərdə təqsirləndirilən şəxslərin işi üzrə məhkəmə baxışı davam etdirilib.

Məhkəmə iclası hakim Elmar Rəhimovun sədrliyi ilə keçirilib. İclasda təqsirləndirilən şəxslər Arayik Harutyunyan, Arkadi Qukasyan, Bako Sahakyan və digərləri tərcüməçilər və vəkillərlə təmin olunublar.

Prosesdə dövlət ittihamını müdafiə edən prokurorlar çıxış edərək birinci instansiya məhkəməsinin qərarının əsaslı olduğunu bildiriblər.

Baş Prokurorluğun nümayəndəsi Abbas Abbaslı 44 günlük Vətən müharibəsi dövründə Ermənistan Silahlı Qüvvələrinin törətdiyi çoxsaylı cinayət faktlarını məhkəmənin diqqətinə çatdırıb. O, Arayik Harutyunyanın cinayətkar fəaliyyətinə dair kifayət qədər sübutların olduğunu və onun apellyasiya şikayətinin əsassız sayıldığını vurğulayıb.

Digər prokuror Anar Ələkbərov isə vaxtilə işğal altında olan Azərbaycan ərazilərində törədilmiş cinayətlər üzrə toplanmış sübutları təqdim edib. O, Bako Sahakyanın da cinayət fəaliyyətinə dair konkret faktlara diqqət çəkərək apellyasiya şikayətinin rədd edilməli olduğunu bildirib.

Prokuror Sevinc Qasımova isə Arkadi Qukasyanın ittiham olunduğu cinayətə dair sübutlara istinad edərək onun apellyasiya şikayətinin əsassız olduğunu bildirib.

İttiham tərəfi ümumilikdə vurğulayıb ki, birinci instansiya məhkəməsində bütün sübutlar hərtərəfli və obyektiv araşdırılıb, zərərçəkmişlərin və şahidlərin ifadələri, ekspertiza rəyləri və digər materiallarla təsdiqlənib.

Məhkəmənin növbəti iclası iyulun 27-nə təyin olunub.