Ermənistanın məkrli siyasəti bitmək bilmir

Ermənistanın Arazdəyən istiqamətində yaydığı dezinformasiyanın ardınca, Rusiya sülhməramlı kontingentinin müvəqqəti nəzarətindəki ərazilərimizdə separatçı tör-töküntülər son günlər mövqelərimizi intensiv atəşə tutur.

Özünə yeni “dost” tapıb, Arazdəyəndə bayraqlar dikəldən Ermənistanın oyunlarını Vaşinqton görüşü ərəfəsində işə salması təsadüf deyil. Sülh üçün danışıqlar masasına əyləşəndə sərgilədikləri ikiüzlü siyasəti indi də davam etdirirlər. Ancaq bu dəfə daha da irəli gedərək, materik boyda ölkəni oyuna salmağa çalışırlar. Daha dəqiq desək, rəsmi İrəvan Vaşinqtonu Bakı ilə üz-üzə qoymaq xülyasındadır.

Mövqelərimizə yenidən atəş açılması, əsgərimizin yaralanması faktı da məkrli planın digər hissəsi idi. Lakin ordumuz bu məqsədyönlü terroru da cavabsız qoymadı. “Qəzəb” əməliyyatı ilə qanunsuz hərbi birləşmələrin 5 üzvü məhv edildi.

Görünən odur ki, Fərrux və Sarıbaba əməliyyatlarından dərs çıxara bilməyən Ermənistan hərbi-siyasi rəhbərliyi Azərbaycanın bütün təxribatlara adekvat cavablar verdiyini dərk etməkdə çətinlik çəkir. Üstəlik qanunsuz hərbi birləşmələr yeni təxribatlara da hazırlaşırlar. Ancaq bir məqamı unudurlar ki, istənilən təxribata Azərbaycan Ordusu sərt və adekvat cavab verəcək, separatçıların hərbi infrastrukturu məhv ediləcək.