Ermənistanın mina terroru davam edir

Vətən müharibəsindən sonra Azərbaycanla Ermənistan arasında münaqişə bitsə də, Ermənistan mina cinayətini davam etdirir. ?

Rəsmi məlumata görə, 2020-ci ildə üçtərəfli bəyanatın imzalanmasından sonra işğaldan azad edilən ərazilərdə 300-ə yaxın şəxs düşmənin basdırdığı ölüm tələsinə düşüb. Onların 50-dən çoxu həlak olub. Son olaraq isə 7 mart, 22 aprel və 1 may tarixlərində mülki vətəndaşlarımız və hərbçilərimiz mina partlaması nəticəsində həm xəsarət alıb, həm də həyatını itirib. Bu fakt bir daha rəsmi İrəvanın terror-təxribat əməllərindən əl çəkmədiyinin və cinayətkar siyasətini davam etdirdiyini sübut edir.

Beynəlxalq konvensiyalara görə piyada əleyhinə minaların tətbiq olunması qəti qadağandır və bu əməl cinayət hesab edilir. Lakin Ermənistan bu əhəmiyyətli məsələdə belə, məsuliyyətsiz və beynəlxalq hüquqa zidd davranış nümayiş etdirir. Təəssüflər olsun ki, beynəlxalq ictimaiyyət Ermənistanın mina terroruna da laqeyd münasibət sərgiləyir.

Qeyd edək ki, hazırda işğaldan azad edilən ərazilərimizin bərpası və doğma yurd-yuvalarımıza həyatın qaytarılması Azərbaycanın əsas strateji hədəflərindən biridir. Lakin dədə-baba torpaqlarımıza "ölüm toxumları"nın basdırılması prosesin ləngiməsinə səbəb olur. Bu təxribatlar isə həm də yeni insidentlərin baş verməsinə səbəb olur ki, bunun da məsuliyyət birbaşa Ermənistanın hərbi-siyasi rəhbərliyinin üzərinə düşür.