Əziz Ələkbərov Saatlı rayonundakı qaz problemindən danışdı

“Bir il bundan əvvəl yeni ilin büdcə müzakirəsində bu tribunadan təmsil etdiyim Saatlı rayonunun qaz problemini qaldırdım və bildirdim ki, Saatlı rayonunun hər dörd kəndindən birində mavi qaz yoxdur, yəni bu kəndlərə qaz çəkilişi həyata keçirilməyib və onu da xatırlatdım ki, dövlət başçısı 2011-ci il may ayının 5-də Saatlı rayonuna səfəri zamanı tapşırıq verib ki, “2012-ci ilin sonuna qədər Saatlı rayonunda qazlaşdırma 100 faiz olmalıdır”.

Bunu Milli Məclisin deputatı Əziz Ələkbərov parlamentin noyabrın 14-də keçirilən plenar iclasında “Azərbaycan Respublikasının 2024-cü il dövlət büdcəsi haqqında” qanun layihəsinin müzakirəsində deyib.

“Mən bu çıxışı edəndə artıq noyabr ayının 2-ci yarısı idi və çıxışımın sonunda onu da xatırlatdım ki, artıq qış qapını kəsib. Həmin kəndlər təəssüf ki, bu qışı da qazsız keçirməli olacaqlar. Təklif etdim ki, heç olmasa, müvafiq qurumlar həmin kəndlərin əhalisinin təcili olaraq ucuz qiymətə alternativ yanacaqla təmin olunması barədə fikirləşsinlər. Bilirsiniz nəticəsi nə oldu? Mən güman edirdim ki, sərt çıxış etmişəm, yəqin bu çıxışdan sonra kimlərsə narahat olacaq, zəng edib nə isə bir izahat verəcək. Amma təsəvvür edin ki, Mirzə Ələkbər Sabir demiş, atılan toplara heç diksinən də olmadı. İndi bu çıxışımdan sonra bir nəticə hasil olacaq ya yox, bunu da zaman göstərəcək”, – deyə deputat bildirib.