FHN təcili hərəkətə keçdi | Maye qazdoldurma məntəqəsi niyə bağlandı?

Tovuz şəhəri, Musa Musayev küçəsi 34 ünvanında fəaliyyət göstərən fərdi sahibkar Qoca Məmmədova məxsus maye qazdoldurma məntəqəsi fəaliyyətini dayandırıb.

Fövqəladə Hallar Nazirliyindən verilən məlumata görə, qurumun Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyi həmin məntəqədə insan həyatı və sağlamlığı üçün təhlükə yarada biləcək pozuntular aşkarlayıb.

Belə ki, maye qazdoldurma məntəqəsində istismar olunan 2 ədəd tutumun istismar müddətinin bitdiyi, tam texniki müayinələrin aparılmadığı, nəzarət-ölçü cihazları və qoruyucu qurğuların yoxlanılmadığı müəyyən edilib.

Aşkar olunan nöqsanların dərhal aradan qaldırılmasının mümkün olmadığı, eləcə də insan həyatı və sağlamlığı üçün yaratdığı təhlükə nəzərə alınaraq maye qazdoldurma məntəqəsinin istismarı agentliyin əməkdaşları tərəfindən dayandırılıb və pozuntuların aradan qaldırılması üçün tərtib olunmuş aktın bir nüsxəsi sahibkara təqdim edilib.