Gömrük rüsumunun 3 dəfə artırılması qiymətləri dəyişdi - Baku TV

Kərə yağının idxalına tətbiq edilən güzəştin müddəti 2026-cı il yanvarın 1-də bitib. Bununla da artıq kərə yağının idxalı üçün gömrük rüsumu 5 faizdən 15-ə yüksəlib.

Bəs gömrük rüsumunun 3 dəfə artması kərə yağının daha da bahalaşmasına səbəb ola bilərmi?

İqtisadçı Xalid Kərimlinin sözlərinə görə, 15 faizlik dərəcə ilə idxalat rüsumuna cəlb olunması təbii ki, kərə yağının pərakəndə satış qiymətlərini bahalaşdıracaq:

“Təqribən sahibkarlar gömrükdən malı keçirərkən 1-1,3 AZN vəsait ödəmiş olacaqlar və nəticədə, sonda məhsulun üzərinə təqribən 1,5-2 AZN qiymət əlavəsi gələcək. Çünki sonradan burada formalaşan maya dəyərindən digər xərclər və faizlər yaranır. Bu baxımdan idxal rüsumu və əlavə dəyər vergisi kimi dolayı vergilərin hamısı son istehlak qiymətini artıran vergilərdir və idxal rüsumunun qalxması kərə yağının satış qiymətlərinə də artırıcı təsir göstərəcək”.

Qeyd edək ki, 2017-ci ildə məhsulun dünya bazarlarında bahalaşmasının ölkə daxilində qiymətlərə təsirini azaltmaq məqsədilə kərə yağının idxalına tətbiq olunan gömrük rüsumu 15 faizdən 5 faizə endirilmişdi. Son rəsmi statistikaya görə, Azərbaycanda kərə yağı istehlakının 44 faizi idxal hesabına ödənilir. 2025-ci ilin yanvar-oktyabr aylarında ölkəyə gətirilmiş məhsulun 1 kiloqramının orta qiyməti 7,22 ABŞ dolları, yəni 12 manat 27 qəpik təşkil edib. Kərə yağının pərakəndə satış qiyməti isə bundan orta hesabla iki dəfə çoxdur.