İstehsalçılar alıcıları aldadır? | Kərə yağları nə qədər təmizdir? - Baku TV

Tanınmış müğənni Xuraman Şuşalı sosial şəbəkə hesabında aldığı kərə yağlarını suda həll edərək onların nə dərəcədə keyfiyyətli olduğunu sınaqdan keçirib. O, təklif edilən kərə yağlarının təbii və ya marqarin olub-olmadığını izləyicilərlə bölüşüb.

Qida məsələləri üzrə ekspert Ağa Salamov isə deyir ki, kərə yağının keyfiyyətini müəyyən etmək üçün ev şəraitində aparılan testlər etibarlı deyil. Onun sözlərinə görə, tərkibində 60 faiz kərə yağı, 20 faiz trans yağ və 20 faiz su olan məhsul belə suda tam təmiz yağ kimi görünə bilər.

Məsələ ilə bağlı Qida Təhlükəsizliyi Agentliyindən bildirilir ki, sosial şəbəkələrdə qida məhsullarının qeyri-peşəkar üsullarla analiz olunması insanlarda çaşqınlıq yarada bilər.

“Sosial şəbəkələrdə və bəzi media vasitələrində vətəndaşların diqqət və marağını cəlb etmək üçün qida məhsulları qeyri-peşəkar üsullarla analiz olunur. Təbii ki, bu cür kustar üsullarla gündəlik istifadə olunan qida məhsullarının qeyri-peşəkar şəkildə standart və tələblər gözlənilmədən müayinə edilməsi və “nəticələrinin” dərhal elan olunması bəzən insanlarda təəccüb və ya çaşqınlıq yaradır.

Bildiririk ki, hər hansı məhsulun xarici görünüşünə baxmaqla və ya primitiv üsullarla analiz etməklə onun təhlükəsizliyi və keyfiyyəti barədə fikir söyləmək olduqca yanlışdır. Qida məhsullarının təhlükəsizliyi və keyfiyyəti barədə yekun rəy bildirmək yalnız laborator şəraitdə müayinədən sonra mümkündür”.

AQTA vətəndaşlara hər hansı şübhəli məhsul aşkar etdikdə qurumun qaynar xəttinə müraciət etməyi tövsiyə edib.