Hamiləlik vaxtı psixoloji gərginlik uşaqlarda hansı xəstəliyi yaradır?

Yaponiyanın Tottori Universitetinin alimləri ananın hamiləlik zamanı psixoloji gərginliyinin uşaqlarında epilepsiya riskinin artmasına səbəb ola biləcəyini aşkar ediblər.

Tədqiqatçılar müəyyən ediblər ki, yüksək səviyyəli ana stresi 1-3 yaş arasında uşağın epilepsiyaya tutulma ehtimalını artıra bilər. Beləliklə, doğum çəkisi və xromosom anomaliyalarına daha bir risk əlavə olunub.

Tədqiqat Yaponiyada təxminən 100 min insanı əhatə edib. Hamiləlik dövründə ananın psixoloji gərginliyi iki dəfə qiymətləndirilib. İştirakçılar stres səviyyələrini 0-dan 6-ya qədər ölçən K6 şkalası üzrə ballarına əsasən qruplara bölünüblər.

Hamiləliyin birinci və ikinci yarısında 5 və ya daha yüksək bal toplayan anaların uşaqlarının 1-3 yaş arasında epilepsiyaya tutulma riski 70 faiz yüksəkdir. Bu tapıntı aşağı doğum çəkisi və xromosom anomaliyaları kimi qarışıq faktorları nəzərə alan çoxvariantlı analizlə təsdiqlənib.

Nəticələr risk faktorlarını müəyyən etməyə kömək etsə də, qeyd etmək lazımdır ki, epilepsiya nadir xəstəlik olaraq qalır və digər amillər, məsələn, aşağı çəki və xromosom anomaliyaları xəstəliyin inkişafına daha güclü təsir göstərir.