"Hamısı evin altındadır, uçsa, kim kömək edəcək?!" | Sakinləri boğaza yığan problem - Baku TV

Yevlax rayonunun Ərəş küçəsində arxlardan axan çirkab sular sakinlərin narazılığına səbəb olub.

Sakinlər Baku TV-nin qaynar xəttinə müraciət edərək bildiriblər ki, uzun müddətdir arxlar təmizlənmir. Nəticədə çirkab sular həyətlərə dolur, ərazidə antisanitar vəziyyət yaranır.

“Antisanitariya baş alıb gedir. Kanalizasiya suları həyətlərə dolur, ev uçsa, kim kömək edəcək?”, – deyə sakinlərdən biri bildirib.

Sakinlər problemin həlli üçün aidiyyəti qurumlara dəfələrlə müraciət etdiklərini, əraziyə baxış keçirilsə də, problemin tam aradan qaldırılmadığını deyirlər.

Məsələ ilə bağlı Yevlax Şəhər Mənzil-Kommunal Təsərrüfatı Birliyindən bildirilib ki, sakinlərin müraciətindən sonra əraziyə baxış keçirilib. Qamışlıq sahə biçilib, arxlar texnikalar vasitəsilə təmizlənib.

Qurumdan həmçinin qeyd olunub ki, yaxın vaxtlarda çirkab suların axıdılmasında çətinlik yaradan boru yenisi ilə əvəzlənəcək.