Hərbi cinayətlərdə təqsirləndirilən erməniəsilli şəxslərə hansı cəzalar veriləcək?

Çoxsaylı cinayətlər törətməkdə təqsirləndirilən Ermənistan Respublikasının vətəndaşları ‒ Arayik Harutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digərlərinin barəsində olan cinayət işləri üzrə açıq məhkəmə prosesinin baxış iclası keçirilib.

Qeyd olunub ki, Ermənistan Silahlı Qüvvələri atəşkəsi dəfələrlə pozmaqla hərbçilərimizi, mülki şəxsləri, onların əmlaklarını, həmçinin dini, təhsil, elm, tibb müəssislərini, xəstə və yaralıların yerləşdiyi yerləri, habelə mühüm strateji əhəmiyyətə malik obyektləri, o cümlədən Bakı-Tbilisi-Ceyhan neft kəmərini hədəf alıblar.

Həmçinin bildirilib ki, Ermənistan Silahlı Qüvvələri tərəfindən verilən işgəncələrin sistematik xarakter daşıması və geniş coğrafiyada yayılması işgəncənin tətbiqinin Ermənistan dövlətinin siyasətini əks etdirdiyini sübut edir.

Təklif olunub ki, Arayik Harutyunyan, Levon Mnatsakanyan, David Manukyan, Davit İşxanyan və David Babayan təcavüzkar müharibəni planlaşdırma, hazırlama, başlama və aparma, müharibə qanunlarını və adətlərini pozma, terrorçuluq, terrorçuluğu maliyyələşdirmə və digər cinayətləri törətməkdə təqsirli bilinməklə ömürlük azadlıqdan məhrum etmə cəzasına məhkum edilsinlər və cəzalarını həbsxanada çəksinlər.

Arkadi Qukasyan, Bako Sahakyan, Madat Babayan və Melikset Paşayanın 20, Qarik Martirosyanın 19, Davit Allahverdiyanın 18, Levon Balayanın 17, Vasili Beqlaryan, Qurgen Stepanyan və Erik Qazaryanın isə 16 il müddətinə azadlıqdan məhrum etmə cəzasına məhkum olunmaları, cəzalarının ilk 10 ilini həbsxanada, qalan hissəsini isə ciddi rejimli cəzaçəkmə müəssisəsində çəkmələri təklif edilib.

Məhkəmə prosesi noyabrın 27-də davam etdiriləcək.