Heydər Əliyev Fondu Qəbələdə məktəbliləri sevindirdi: 150 yaşlı məktəb təmir edildi

Qəbələnin Nic qəsəbəsində 150 yaşlı məktəb Heydər Əliyev Fondu tərəfindən aparılan təmirdən sonra istifadəyə verilib.

Məktəblə bağlı 2 il öncə Prezident İlham Əliyev qəsəbəyə gəlişi zamanı tapşırıq verib.

Belə ki, Prezident İlham Əliyev və birinci xanım Mehriban Əliyeva 2021-ci ilin may ayında Qəbələnin Nic qəsəbəsinə səfərləri zamanı Müqəddəs Məryəm Ana Alban kilsəsində Heydər Əliyev Fondunun apardığı bərpa işləri ilə tanış olublar.

Bu vaxt Alban-Udi xristian dini icması dövlət başçısına qəsəbədə 150 yaşı olan məktəbin təmiri ilə bağlı müraciət edib. İcmanın sədri Robert Mobili bildirib ki, elə həmin gün təməl daşı qoyulub və məktəbin inşasına başlanılıb.

Qeyd edək ki, yeni tədris ilində Heydər Əliyev Fondu tərəfindən Bakıda və regionlarda əsaslı təmir və bərpa olunan, eləcə də yeni inşa edilən 22 təhsil müəssisəsi – 19 məktəb və 3 məktəbəqədər müəssisə müəllim və şagirdlərin istifadəsinə verilib.