"Heyvan döyüşlərini əyləncəyə çevirmək vəhşilikdir" | "Heyvanı canlı hədəfə çevirmək olmaz" - AMİN

“Amin” verilişinin yeni buraxılışında filosof, aparıcı Müşfiq Ötgün və ilahiyyatçı Vüqar Səmədov islamda heyvan haqları mövzusunu müzakirə ediblər.

Vüqar Səmədovun sözlərinə görə, müasir dövrdə müsəlmanların heyvan hüquqlarına etinasız yanaşması ilə bağlı yanlış rəy formalaşdırılmağa çalışılsa da, “Quran” və islam tarixi bunun əksini subut edir:

“Heyvanlar kainatın əsas hissəsidir. “Qurani-Kərim”də heyvanlar haqqında bir çox ayələr var, hətta surələrə “Bəqərə” (İnək), “Nəhl” (Arı), “Nəml” (Qarışqa), “Ənkəbut” (Hörümçək) və “Fil” kimi adlar verilib. Bütün canlılar Allahın qüdrətini göstərir və öz dillərində Allaha zikr edirlər”.

V.Səmədov islamda heyvanlara münasibət, qurban kəsimi etikası və canlılara mərhəmətin önəmini də vurğulayıb:

“Peyğəmbərimiz heyvanlara əziyyət verilməsini, onlara ağır yük yüklənməsini və hədəf kimi istifadə olunmasını qətiyyətlə qadağan edib. Hədislərdə də buyurulur ki, yer üzündə olanlara mərhəmət edin ki, göydəkilər də sizə mərhəmət etsin. İnsan hər zaman təbiətə və canlılara qarşı şüurlu və mərhəmətli olmalıdır”.