Hoteldə zəhərlənənlərin yaxınları Baku TV-yə danışdı | Qurum təkzib etdi

Paytaxtın Səbail rayonunda fəaliyyət göstərən hotellərin birində zəhərlənən dörd dostla bağlı əhali arasında müxtəlif fikirlər səslənib.

Onların qidadan zəhərləndiyi bildirilsə də, Qida Təhlükəsizliyi Agentliyi bu məlumatı təkzib edib. Zərərçəkənlərin qohumları isə fərqli fikirdədirlər.

“Tibbi ekspertiza var, qaranlıq heç nə qalmayacaq, ictimaiyyətə hər şey açıqlanacaq. Kənan içkiyə meyilli uşaq olmayıb, siqaretdən də uzaq olub. Dostları da bu barədə informasiya verəcəklər, onlar bir yerdə olublar, nə baş verib deyəcəklər”, – zəhərlənmədən dünyasını dəyişən Kənan Mustafayevin əmisi deyib.

Qeyd edək ki, Səbail rayonunda yerləşən hoteldə dörd nəfər kişi zəhərlənmə diaqnozu ilə bir saylı Şəhər Klinik Xəstəxanasına çatdırılıb. Həkimlər gələnə kimi Kənan Mustafayev və Orxan Əmirovun vəfat etməsi məlum olub. Nicat Cabbarlı və Xəzər Cabbarlı isə koma halında xəstəxanaya çatdırılıblar.