İçərişəhərdəki məscidlərin bilmədiyiniz keçmişi | Qədim küçələrdə gizlənən sirlər - AMİN

“Amin” verilişinin yeni buraxılışında Əməkdar mədəniyyət işçisi, aparıcı Rahib Azəri ilə İçərişəhərin tarixi, qədim məscidlər, şəhərin multikultural keçmişi, Bakı milyonçuları və qoçuların şəhərin asayişindəki rolu müzakirə olunub.

Rahib Azəri İçərişəhərdə tarixən 28 məscidin olduğunu və “28” rəqəminin şəhərin müxtəlif məkanlarında özünü göstərdiyini bildirib:

“Tarixən 28 məscid olub. Onlardan 24-ü günümüzə qədər gəlib çatıb. Ümumiyyətlə, 28 rəqəmi İçərişəhərdə çox gəzir. “Qız qalası”nın kiçik qülləsinin hündürlüyü 28 metrdir. Dayandığımız yer dəniz səviyyəsindən 28 metr aşağıdadır. Deyilənlərə görə, İçərişəhərdə 28 küçə olub”.

Rahib Azəri İçərişəhərdəki məscidlərin yalnız ibadət məkanı olmadığını, eyni zamanda ilkin təhsil ocaqları kimi fəaliyyət göstərdiyini vurğulayıb:

“Məscidlərin hər birində üləmalar həm də dərs deyərdilər. Məscidlər ilkin təhsil ocaqları kimi çıxış edirdi. Burada uşaqlara əlifba öyrədilir, “Quran” oxumaq tədris olunurdu”.

O, qədim Bakıda asayişin qorunmasında qoçuların mühüm rol oynadığını bildirib:

“Bakıda asayişin yaranmasında qoçuların çox böyük rolu olub. Elə məhəllələr vardı ki, polis oraya daxil olmurdu. Həmin bölgələrdə asayişi qoçular qoruyurdular və hər qoçunun özünün müəyyən ərazisi var idi”.