İnsanlar yasa həvəslə gedir, nəinki toya | Erkin Qədirliyə görə müdriklik nədir? - AMİN

Baku TV-də “Amin” verilişinin yeni buraxılışı yayımlanıb.

Verilişin budəfəki buraxılışında “Kamil insan kimdir” sualı ətrafında müzakirə aparılıb.

Millət vəkili Erkin Qədirli mövzu ilə bağlı danışarkən qeyd edib ki, dünyəvi hüquqda kamil insan anlayışı yoxdur, çünki hüquq insanı olduğu kimi qəbul edir:

“Dövlət tərəfindən qorunan yalnız insanın ləyaqətidir, şərəfi deyil. Ləyaqət anadangəlmədir, insanın ölümü ilə bitir. Şərəf isə qazanılır və qazanıldığı kimi də itirilə bilir. Ona görə də dövlət şərəfi qorumur. Şərəfi insan yalnız özü qorumalıdır. Bu məsələdə insanlar bərabər deyillər, kiminsə şərəfi çoxdur, kiminsə az. İnsan şərəfsiz də ola bilir”.

Erkin Qədirlinin sözlərinə görə, ağıllı insan xoşbəxt ola bilmir:

“Cəmiyyətdə ağıllı insanın paxıllığını çəkirlər. Kimsə ağıllı davranmağa çalışanda onu qınayırlar. Deyirlər ki, özünü ağıllı göstərir. İnsanlar yasa daha həvəslə gedirlər, nəinki toya. Çünki toyda başqalarının sevindiyini görüb özlərini rahat hiss etmirlər”.