Kişmişin insan orqanizminə təsiri | Tədqiqatçılardan yeni araşdırma

Amerika və Kanadadan olan tədqiqatçılar qrupu kişmişin 2-ci tip diabetli insanlara qan şəkərinin səviyyəsini idarə etməyə kömək etdiyini müəyyən edib.

Dəmir, lif və polifenollarla zəngin olan bu məhsul yeməkdən sonra iki saat ərzində qlükoza səviyyəsini azalda bilər.

Qeyd edək ki, 2-ci tip diabet bədənin şəkəri emal etməyə kömək edən insulin hormonunun çatışmazlığı və ya düzgün işləməməsi ilə xarakterizə olunur. Buna görə də ən vacib vəzifə sabit qlükoza səviyyəsini saxlamaqdır.

Kişmiş kimi təbii qidalarda olan fruktozanın orta səviyyədə istehlakı metabolik proseslərə müsbət təsir göstərir.

Təcrübə zamanı 10 sağlam könüllü üç fərqli pəhriz tətbiq edib. Onlardan biri ağ çörəklə, digər ikisi isə kişmişlə reallaşdırılıb. Sadəcə pəhrizlərin birində 28, digərində 69 qram kişmiş istifadə edilib.

Nəticələr göstərib ki, ağ çörəklə müqayisədə kişmişli pəhrizlər qan şəkərinin səviyyəsini əhəmiyyətli dərəcədə aşağı salıb və insulin reaksiyasını azaldıb.

Aşkar faydalarına baxmayaraq, mütəxəssislər kişmişi normada istehlak etməyi və pəhrizi dəyişməzdən əvvəl həkimlə məsləhətləşməyi tövsiyə edirlər.