“Məcbur olub boşandım” | Sosial şəbəkədə fəryad edən iki qız anasının həyat hekayəsi - ARZUNUN VAXTI

“Arzunun vaxtı” verilişinin budəfəki qonağı iki uşaq anası, 31 yaşlı Ruqiyyə Qurbanova olub.

O, 10 illik evlilik həyatından, yaşadığı çətinliklərdən və boşandıqdan sonrakı 4 il ərzində təkbaşına apardığı mübarizədən danışıb. Ruqiyyə Qurbanova bildirib ki, ailədəki əsas problem yoldaşının içkiyə aludəçiliyi olub:

“10 il ərzində hər cür çətinliyə dözdüm, fədakar həyat yoldaşı oldum. Lakin o bizi soyuq fevral günündə küçəyə atdı, borcları üstümə qoyub getdi. Nə aliment ödədi, nə də uşaqlarını axtardı”.

31 yaşında böyük məsuliyyət daşıdığını vurğulayan R.Qurbanova sosial şəbəkədə çəkib paylaşdığı videonun rezonans doğurmasından da söz açıb:

“İşdən gəlmişdim, çox yorğun idim. İllərdir susdurulduğum üçün o videonu çəkib səsimi çatdırmaq istədim. Dünəni və bu günü təkbaşına bacarsam da, bundan sonrasını övladlarım üçün dəstəksiz çatdıra bilməyəcəyəm. Mən uşaqlarımın haqqı olan alimenti istəyirəm”.

Boşanmış qadınların cəmiyyətdə və ata evində qarşılaşdığı çətinliklərə toxunan iki uşaq anası valideynlərə də müraciət edib:

“Cəmiyyətdə boşanmış qadın ata evində belə yad hesab olunur. Bir çox valideynlər “o evdən yalnız kəfənlə çıxmalısan” düşüncəsi ilə yaşayır. Valideynlər övladlarına sahib çıxmalıdırlar, çünki qadınlar və uşaqlar çox əziyyət çəkirlər”.