“İnternetdə tanış olduq, ailəm dağıldı” | “2 dəfə evləndim, qızımla danışanda pis oluram ki...”

“Arzunun vaxtı” verilişinin budəfəki buraxılışında əlilliyi olan 32 yaşlı Elvin Əliyev həyat hekayəsindən və xəstəliyinin yaratdığı çətinliklərdən danışıb.

Uşaqlıqda atasını itirən Elvin ana tərəfdən irsi olan miopatiya xəstəliyindən əziyyət çəkdiyini bildirib. Onun sözlərinə görə, 18 yaşında keçirdiyi velosiped qəzasından sonra vəziyyəti daha da ağırlaşıb.

“Əvvəllər belə deyildim. Taksi sürücüsü idim, ailəmi dolandırırdım. İndi ayaqlarımda qıcolmalar olur, qollarım zəifləyir. Onurğamdakı əyrilik daxili orqanlarıma da zərər verir. Vaxtlı-vaxtında müalicəmi etdirə bilmirəm”, – deyə o qeyd edib.

Maddi çətinliklər yaşadığını deyən Elvin kirayə haqqını ödəməkdə çətinlik çəkdiyini və sosial şəbəkələrdə edilən yardımlar hesabına dolandığını söyləyib. O, yaxın qohumlarının vəziyyətindən xəbərdar olmasına baxmayaraq, ona dəstək göstərməməsindən də gileylənib.

“Əmilərim, bibim burada yaşayır, mən isə onların evlərinin yanında kirayədə qalıram. Vəziyyətimdən xəbərləri var, amma qapımı açan yoxdur. Xəstə kimin nəyinə lazımdır?!”, – deyə Elvin bildirib.

O, ilk ailəsinin dağılmasından və qızından ayrı qalmağın çətinliyindən də danışıb. İkinci dəfə ailə həyatı quran Elvinin hazırda ən böyük arzularından biri yenidən ata olmaqdır.