Media qurumları arasında əsas məsələlər diqqət mərkəzində | Görüşün detalları açıqlandı

Özbəkistan Milli Teleradio Kompaniyası sədrinin müavini Mamadamin Safarovun rəhbərlik etdiyi nümayəndə heyəti Baku TV-nin qonağı olub.

Özbəkistan Milli Teleradio Kompaniyası ölkənin dövlət teleradio yayım şəbəkəsidir, 12 TV kanalı, 4 radio kanalı və 12 regional teleradio kompaniyadan ibarətdir. Yayım rəqəmsal, analoq, peyk və internet üzərindən aparılır.

Görüş zamanı Baku TV-nin direktoru Ramin Cəfərov qonaqlara kanalın fəaliyyəti, müasir yayım texnologiyaları və beynəlxalq media şəbəkəsi haqqında ətraflı məlumat verib. Qonaqlar Baku TV-nin iş prosesi ilə yaxından tanış olublar.

Tanışlıq zamanı Baku TV-nin beş dildə operativ xəbər istehsal etməsi, kanalın “YouTube” platformasında abunəçi sayının üç milyona çatması və ötən il ərzində yayımlanan videoların bir milyarddan çox baxış toplaması xüsusi qeyd olunub.

Vurğulanıb ki, Baku TV-ni yalnız internet üzərindən deyil, həm də kabel və peyk yayımı vasitəsilə Azərbaycanın bütün bölgələrində, eləcə də Avropa və Asiyada izləmək mümkündür.

Tədbirdə həmçinin “Rəqəmsal Media Məktəbi” layihəsinin əhəmiyyəti vurğulanıb. Onun məzunlarının Baku TV, o cümlədən müxtəlif media qurumlarında işlə təmin olunduğu bildirilib.

Baku TV-nin yalnız xəbər istehsalı ilə məhdudlaşmadığı, həm də film və sənədli layihələr hazırladığı da qeyd olunub.

Bildirilib ki, kanalın istehsalı olan “Söz” sənədli filmi beynəlxalq uğurlar qazanıb.

Görüş zamanı Azərbaycan və Özbəkistan media qurumları arasında tərəfdaşlıq imkanları ətraflı müzakirə olunub. Tərəflər gələcək əməkdaşlıq imkanlarını dəyərləndirməyə hazır olduqlarını bildiriblər.