Metroda tibb məntəqələri quraşdırılacaq, yoxsa...? - “Bakı Metropoliteni”ndən açıqlama

Hər gün minlərlə insan metro stansiyalarından istifadə edir. Günün pik saatlarında isə bu rəqəm iki-üç qat artır.

Bəzi hallarda sərnişinlərin arasında səhhəti pisləşən şəxslər olur ki, bu da öz növbəsində stansiyalarda tibb məntəqələrinin quraşdırılması məsələsini gündəmə gətirir.

Dünya təcrübəsində – Türkiyədə, Kanadada, İsraildə, Norveçdə bu təcrübəni görə bilərik.

Bəs görəsən, ölkəmizdə sözügedən dünya təcrübəsini tətbiq etmək mümkündürmü?

Məsələ ilə bağlı Səhiyyə Nazirliyindən bildirilib ki, hər hansı dövlət müəssisəsi daxilində tibb məntəqəsi və ya məntəqələri yaratmaq istəyirsə, ilk növbədə Nazirliyə müraciət etməlidir:

“Müraciət əsasında yaradılan məntəqəyə Respublika Gigiyena və Epidemilogiya Mərkəzinin əməkdaşları tərəfindən baxış keçirilir və müvafiq rəy verilir. Müsbət rəy veriləcəyi təqdirdə yaradılan tibb məntəqəsində çalışacaq tibb heyətinə aidiyyəti qurum tərəfindən qərar verilir”.

“Bakı Metropoliteni”nin sözçüsü Bəxtiyar Məmmədovun sözlərinə görə, səhiyyə sistemi ilə qarşılıqlı müntəzəm əməkdaşlıq şəraitində fəaliyyət daim təmin olunub: “Ümumiyyətlə, son dövrlərdə “Bakı Metropoliteni”ndə daha çox təcili və təxirəsalınmaz tibbi yardım xidməti ilə əməkdaşlıq forması inkişaf etdirilib. Bununla belə, dövri monitorinqlər və bunun nəticələri təhlil edilir. Qarşıdakı dövr ərzində də mütləq qaydada bu məsələlər geniş spektrdan və lazım olan qaydalara uyğun olaraq təmin olunacaq”.