Moskva prospektinin adı dəyişdiriləcək?

1990-cı ilin yanvarın 19-da təxminən gecə saat 23:30-da SSRİ rəhbərliyinin qərarı ilə Bakıya yeridilmiş və aralarında erməni mənşəli əsgərlərin də olduğu 66 minlik qoşun hissələri 147 insanın qətlə yetirildiyi, 744 nəfərin ağır xəsarət aldığı, 841 nəfərın qanunsuz həbs olunduğu, 200-dən çox şəxsi və dövlət əmlakının dağıdıldığı qanlı 20 Yanvar faciəsinə imza atdı. Bu qırğın əmrini verən Mixail Qorbaçov sonralar Bakıya qoşun yeritməyin hakimiyyətinin ən böyük səhvi olduğunu dolayı yolla olsa da, etiraf etdi.

Həmin gün SSRİ qoşunları Bakıya 3 istiqamətdən daxil olmuşdu. Bunlardan biri paytaxtın şimal girişi, yəni “Şamaxinka” adlanan ərazi idi. Bu ərazinin bir hissəsində təmir-bərpa işləri aparılsa da, binalarda hələ də faciənin izlərinə rast gəlmək mümkündür. Ən çox qətllər və ən böyük dağıntılar da məhz bu istiqamətdə baş vermişdi. “Azərbaycanfilm” kinostudiyasının binası da hadisəyə şahidlik edənlərdəndir.

Bütün bunların fonunda həmin qanlı şənbə gününün yaşandığı ərazidən keçən yol Bakı Şəhər İcra Hakimiyyətinin qərarı ilə 2004-cü ildən “Moskva prospekti” adlandırılır. Bu qərardan narazı olan hadisənin şahidləri, sakinlər isə məhz faciənin adı ilə bağlı olaraq prospektin “20 Yanvar” adlandırılmasını istəyirlər.

20 Yanvar faciəsinin şahidi, həmin vaxt Keşlə Maşınqayırma zavodunun direktoru olan Vahid Əhmədovun da fikirincə, prospektə “Moskva” adının verilməsi doğru deyil.

Məsələ ilə bağlı Bakı Şəhər İcra Hakimiyyətindən bildirilib ki, küçə adlarının dəyişdirilməsi və yeni adların verilməsi ilə bağlı BŞİH-də müvafiq komissiya fəaliyyət göstərir. Komissiyaya bu məsələ ilə bağlı heç bir müraciət daxil olmayıb və məsələ gündəlikdə yoxdur.