MTK-dan tələb edirik ki... | Xırdalan sakinləri suya həsrət qaldı, problem nə vaxt həll olunacaq?

İsti yay günlərində paytaxtın bəzi nöqtələrində suyun gəlməməsi, ya da çox vaxt fasilələrlə verilməsi insanları çıxılmaz vəziyyətə salıb.

Bu problemdən əziyyət çəkənlərin bir qismi Xırdalanın payına düşür.

Vətəndaşlar giley-güzar edirlər ki, artıq bir aya yaxındır su üzünə həsrətdirlər. Dərdlərinə dərman olan da yoxdur.

“Susuzluqdan çox əziyyət çəkirik. Evdə körpə uşağım var, bu vəziyyətdə yaşamaq mümkün deyil”, – deyə sakinlərdən biri şikayətini bölüşüb.

Məsələ ilə bağlı yaşayış kompleksinin komendantı bildirib ki, narazılığın əsas səbəbi suyun səhər və axşam saatlarında fasilələrlə verilməsidir.

O əlavə edib ki, kompleksin su çəni sakinlərin say çoxluğu ilə əlaqədar tələbatı tam ödəyə bilmir. Ona görə də ərazidə yeni su çəninin tikintisi nəzərdə tutulub.

İri Şəhərlərin Birləşmiş Su Təchizatı Xidmətindən isə bildirilib ki, Bakı və Abşeron yarımadasında havanın hədsiz isti keçməsi əhalinin suya tələbatını artırıb. Bu da mərkəzi anbarlarda su ehtiyatını kəskin azaldıb. Bəzi ərazilərdə buna görə suyun fasilələrlə verilməsi təyin olunub. Yaxın günlərdə problem aradan qaldırılacaq.