Nəzarətsiz qalan kanalizasiya quyuları ölümə səbəb olur

Mingəçevirdə baş verən bu hadisədə velosipedlə hərəkət edən şəxs mühafizə olunmayan kanalizasiya quyusuna düşüb və qarnına dəmir parçasının batması nəticəsində həyatını itirib. Amma Bülbülədə baş verən analoji hadisədə xoşbəxtlikdən velosipedçi müxtəlif xəsarətlər alsa da, ölümün cəngindən xilas ola bilib. Faciə ilə nəticələnən, lakin həlli sadə olan bu problemə niyə diqqət ayrılmır?

“Azərsu”nun sözçüsü Anar Cəbrayıllı bildirib ki, bu, daha çox baxış quyularının qapaqlarının oğurlanaraq metal qəbulu məntəqələrinə verilməsilə izah olunur:

“Bu hala həm Bakıətrafı ərazilərdə, mərkəzi küçələrdə, eləcə də avtomobil yollarının hərəkət hissələrində rast gəlinir. İcra hakimiyyəti və polislə birlikdə bu halların qarşısını almaq üçün tədbirlər görürük. Son zamanlar “Azərsu” tərəfindən istehsal edilən və quraşdırılan kanalizasiya qapaqlarını oğurlamaq mümkün deyil, çünki onlar baxış quyusuna birləşik vəziyyətdə olur”.

Təhlükəsizlik üzrə ekspert Elmar Nurəliyevin sözlərinə görə isə kanalizasiya quyuları sıradan çıxıbsa, oğurlanıbsa, həmin yerdə xəbərdaredici lövhə qoyulmalı, baryerə alınmalıdır.

Daxili İşlər Nazirliyinin məlumatına görə, kanalizasiya qapaqlarının, suötürücü qurğuların barmaqlıqlarının oğurlanması faktları ilə əlaqədar mütəmadi tədbirlər keçirilir. Təkcə bu il hüquq-mühafizə orqanlarına məlum məsələ ilə bağlı 18 müraciət daxil olub.

Daxili İşlər Nazirliyindən o da bildirilib ki, dəmir konstruksiyaları satış məntəqələrinə təqdim edənlər və onları alanlarla bağlı araşdırmalar aparılır.