Novruzun ilk çərşənbəsi qeyd olunur

Bu gün fevralın 27-si Novruzun ilk – Su çərşənbəsidir. Bu çərşənbədə bayram hazırlıqları başlayır.

İnanclara görə, Tanrı əvvəlcə suyu yaratdığı üçün ilk olaraq məhz Su çərşənbəsi qeyd edilir. Bəzi mənbələrdə ona əzəli çərşənbə, gül çərşənbə də deyirlər.

Bu zaman suyun dirilməsi özünü göstərir. Qədim inanclara görə, bu çərşənbə suya tapınma inancı ilə başlayır. Belə ki, təzə su, yəni səhər dan yeri sökülmədən gətirilən köpüklü ağ su min bir dərdin dərmanı sayılır.

Yazın gəlişini xəbər verən Novruz bayramı ilin başlanğıcı kimi də qəbul edilir. Məhz buna görə də insanlar sudan onun kimi şəffaf və gözəl bir ilin keçməsini arzulaya bilərlər. İlk tonqalın su çərşənbəsində yandırılması buzların əriməsi, artıq qışın arxada qalmasının göstəricisidir. Bu çərşənbədə masa üzərinə su qoymaq, masada suyun aşması xeyirə yozulur. Əgər süfrənizdə su aşıb tökülərsə, həmin ilin sizin üçün bol bərəkət gətirəcəyi gözlənilir.

Bu çərşənbədə lal axan suyun üzərindən keçmək uğursuzluq əlaməti sayılır. Bu vaxt hamının həyətində tonqal qalanır və bayram ovqatının yaxınlaşdığı nəzərə çatdırılır. Həmin gün insanların bir-birinin üstünə su atması da uğura işarədir.